Verbo incoativo

Iste articlo ye escrito con as normas graficas d'o 87. Si quiers puetz aduyar cambeyando a la grafía actual y sacando dimpués ista plantilla.

Se claman berbos incoatibos, en morfolochía lingüistica, a los berbos que en a terzera y segunda conchugazión presentan morfemas berbals irregulars con una -x- (-x- de las que se pronunzian -ix- en aragonés oriental). Istos berbos etimolochicament marcaban lo prenzipio d'una azión u comportamiento, encara que en a luenga actual mutios d'ellos perdioron iste sennificado.

Son berbos incoatibos de la segunda conchugazión rematatos en -er:

• amanixer, conoxer, crexer, florixer, merexer, naxer, y pareixer.

Son berbos incoatibos de la terzera conchugazión rematatos en -ir:

• En belsetán: estretir, alarguir, encahpurnir, escaseir, engaldir, empetrequir, enfurnir, patir, estranguchir, embalbir, enfredir, escaldabuchir, embabuquir, amansir, endolorir, enfosquir, encallorpir, engarrolir, endurir, esparbutir-se, enchapurnir, (en)chupir, estremurdir, escantechir, escurir, enzurzir, endulzir, enchugardir, encloquir, entreclarir, desburdir-se, enflaquir, agrandir, engrandir, escurrir, en.negrir, emblanquir, espesir y esclarir. Tamién putrir, escupir, seguir, turir, furnir, emporquir, esturdir, rebutir, tusir e putir, que pueden conchugar-sen como incoatibos u no.

• En tellán no bi n'ha imbestigazions sobre esto pero se sape que se conchuga como incoatibo siguir/asiguir.

• En chistabín: ablandir, aclarir, buquir, cañir, embullir, esbandir, escurir, estrechir, funir, respesir y restreñir.

• En aragonés meyebal estioron incoatibos destruir, diferir, establir, excedir, exercir, exibir, expel·lir, estatuir, finir, restituir, substituir e constituir, muitos d'ellos neolochismos u cultismos.

Contenius 1 Presonas irregulars 2 Los berbos incoatibos en latín bulgar 2.1 Aria berbal conserbadora 2.2 Aria berbal ennobadora 2.3 Comparanza 3 Berbos incoatibos en aragonés 4 Berbos incoatibos en catalán 4.1 Berbos incoatibos en catalán occidental 4.2 Berbos incoatibos en catalán oriental 5 Berbos incoatibos en rumán

[editar] Presonas irregulars

Respeuto a las conchugazions de berbos rematatos en -er e -ir en idioma aragonés son irregulars. S'ha de parar cuenta que pa la conchugazión d'un berbo incoatibo rematato en -er, como conoxer, la -x- fa parte de la radiz, pero en la conchugazión d'un berbo rematato en -ir, la -x- fa parte de la desinenzia berbal e no fa parte de la radiz. Las irregularidaz amanixen en la primera presona de lo present d'endicatibo y en totas las de lo subchuntibo. La terzera presona singular no presenta -e final en las bariedaz millor conserbatas de l'aragonés oriental e aragonés zentro-oriental.

Present d'endicatibo	Present de subchuntibo
Conoxco	Conoxca
Conoxes	Conoxcas
Conox(e)	Conoxca
Conoxemos	Conoxcamos
Conoxez	Conoxcaz
Conoxen	Conoxcan

Pa berbos de la conchugazión rematatos en -ir en Chistén (con desinenzia de primera presona plural -an propia de lo chistabín) lo modelo ye:

Present d'endicatibo	Present de subchuntibo
respesixco	respesixca
respesixes	respesixcas
respesix	respesixca
respesín	respesixcán
respesiz	respesixcaz
respesixen	respesixcan

Nota: En aragonés chistabín s'emplega -n como desinenzia de primera presona plural correspondendo a -mos de l'aragonés cheneral. D'esta traza respesín e respesixcán, corresponden a unas formas teoricas respesímos e respesixcámos que podioron aber-sen dato en las bariedaz d'aragonés que tienen incoatibos de la conchugazión rematata en -ir (belsetán u aragonés de Ballibió), pero que no se'n tien notizia encara.

[editar] Los berbos incoatibos en latín bulgar

En latín i eba berbos incoatibos en la 2ª conchugazión en -ere. N'esta conchugazión coesistiban con berbos de mobimiento que teneban lo mesmo adchetibo u sustantibo etimolochico y un perfecto en -ui:

• FLORESCERE e FLORERE compartiban FLORIS, FLORIDUS.

Atras parellas de berbos on se desbeniba lo mesmo yeran: ALBERE/ALBESCERE, CALERE/CALESCERE e RUBERE/RUBESCERE.

[editar] Aria berbal conserbadora

Bi ha una zona arcaizant representata güei por lo gallego-portugués, l'arturlionés, lo castellán e lo sardo, on lo sufixo incoatibo -ESC- conserba la suya funzión clasica e la conchugazión de lo present de los berbos rematatos en -ir contina la traza latina. Los berbos incoatibos en -ESCERE se mantienen en esta aria conserbadora:

• Anoitecer, Florecer (portugués)
• Anochecer, Florecer (castellán)

[editar] Aria berbal ennobadora

N'un aria ennobadora, representata por los actuals rumán, italián, retorromán, francés, occitán e catalán, los berbos de la cuarta conchugazión pueden estar:

• Grupo antigo que conserba la conchugazión latina clasica (tipo DORMIRE).
• Grupo bibo de berbos examplatos que chusmeten la cuarta conchugazión a un prozeso de nibelazión azentual con l'aduya de lo sufixo -ESC- desfunzionalizato.

Esta aria coinzide con l'aria on se fan los partizipios en -ut(o).

Lo berbo de mobimiento u estato en -ERE pasa ta la 4º conchugazión, conchugazión en -IRE, y se fusiona con lo berbo incoatibo en -ESCERE, de forma que l'infintibo se fa en -ir, pero bellas formas berbals se fan a partir de l'antigo infinitibo en -ESCERE. Asinas doncas n'ixa zona lo modelo, modificato seguntes la fonetica de cadaguna de los idiomas neolatins, ye:

• Infinitibo: Florir.
• Present: Floresco, Florescis, Florescit, Florimus, Floritis, Florescunt.

N'ixa aria ennobadora, los berbos de la cuarta conchugazión serán tanto los que en latín clasico yeran de la 4ª conchugazión u en -IRE, como los de la 2ª conchugazión u en ERE fusionatos con la forma incoatiba.

En lo espazio ennobador los berbos de la cuarta conchugazión en -IRE que se conchugan como incoatibos pueden estar:

• Berbos que se desembolicoron de l'antiga alternanzia FLORERE/FLORESCERE, dando florir.
• Berbos que pasoron dreitament de lo incoatibo -ESCERE sin pasar por -ERE, por eixemplo grandir que bien de GRANDESCERE.
• Berbos de la cuarta conchugazión que pasoron a lo modelo de florir, como la evolución de FINIRE en francés (finir) e PETIRE en rumán (a peti).
• Neolochismos intrarromanicos creyatos dentro de cada luenga como l'occitán embellir (de bell) u lo rumán a numi (de nume).
• Cultismos latins: punir en occitán e catalán.
• Eslabismos e chermanismos: choisir en francés, a iubi en rumán.

[editar] Comparanza

Podemos comparar los resultatos diferents en dos luengas cheograficament zercanas pero cadaguna d'un aria berbal. Si femos una lista de berbos que en castellán tienen -cer y en catalán -ir, encara que no sennifiquen lo mesmo de tot e que totas no sigan formas comuns tenemos:

Castellán	Catalán
amanecer	amanir
agradecer	agraïr
amortecer	esmortir
desfallecer	defallir
desvanecer	esvair
esclarecer	aclarir
ensordecer	ensordir
establecer	establir
favorecer	afavorir
florecer	florir
fortalecer	enfortir
ofrecer	oferir
padecer	patir

[editar] Berbos incoatibos en aragonés

La -x- de los berbos incoatibos probién de la terminazión de lo infitibo en latín -ESCERE (pronunziato /-éskjere/) de las formas de present:

• COGNOSCERE > Conoxer

Como en la mitat oriental de l'Alto Aragón la evolución de la -X-, la -SK- e la -KS- latinas se fan con una -i (faixa, coixo), lo berbo incoatibo n'ixa zona se pronunzia con una -i que seguntes la grafía de Uesca no s'ha d'escribir:

• COGNOSCERE > Conoixer.

Por la presión de lo castellán, la terminazión en -e(i)xer ha retaculato muito e nomás la trobamos que en las altas bals de l'aria zentro-oriental, e la ha sustituito la terminazión en -ezer (parezer, amanezer, esmortezer).

La gramatica de Francho Nagore aconsella emplegar en aragonés común las formas en -xer, que son las chenuinas e responden a la fonetica aragonesa. De feito ye como gosa escribir-se en aragonés común.

La luenga aragonesa ye cheograficament entre las dos zonas que bi eba en latín bulgar con respeuto a los berbos incoatibos, pero parix que més que més en la primera, con las atras luengas iberorromanzes. En la lista de berbos de la tabla comparatiba d'alto, predominan los berbos como amanixer, pero tamién bi ha casos contrarios como aclarir que contrastan con lo castellán esclarecer. En ansotán bi ha berbos incoatibos como amanixer, compadexer, conoxer, crexer, merexer, naxer, pareixer, reconoxer, texer, que se conchugan en toz los tiempos e presonas como -ex/ix- e d'atros que tienen doblez e se fan con dos conchugazions completas, una sin -ex/ix- e l'atra con -ex/ix-: aclarir/aclareixer, ablandir/ablandexer. Ye curioso en ansotán lo caso de lo berbo ofrir/ufrir/ofrexer, que fueras de lo infinitibo, nomás tien que conchugazión con -ex/-ix-. En castellán poderban estar d'orichen nabarroaragonés, catalán u galorromanze berbos como aburrir, podrir e atros que se relazionan con aborrecer, pudrecer.

Se sape que en chistabín bi ha berbos de la conchugazión rematata en -ir que tienen una conchugazión con l'incremento en -ix: ablandir, aclarir, buquir, cañir, embullir, esbandir, escurir, estrechir, funir, respesir, restreñir. L'aria on bi ha berbos incoatibos de la conchugazión en -ir ye: bal de Bió, bal de Bielsa, bal de Chistau e bal de Benás.

En los testos notarials de la Bal de l'Ebro de los sieglos XIV e XV, los berbos establir y estatuir teneban formas en lurs presents de subchuntibo y endicatibo como establezca, estatuezca, estatuesca, estatuesco. Establir y esmortir representan infinitibos en -ir que contrastan con formas que güei son en -ezer en aragonés cheneral y -e(i)xer en aragonés más chenuíno.

Tamién se conoxen las formas berbals en aragonés meyebal adquerezcan, espellescan, distribuescan e constituezcan, e pueden endicar que berbos como espellir, distribuir e constituir aigan puesto tener incrementos berbals con -x- d'incoatibo. Lo berbo bendecir puet prener formas presonals incoatibas tipo bendizca en castellán d'Aragón.

Tamién bi ha berbos que en aragonés meyebal teneban formas en -xer e que güei terminan en -ir, dica en castellán: concernescer, punescer, presumescer, pero poderban estar ipercorrezions a partir de conzernir, punir e presumir.

Cal pensar en lo caso d'esmortir (güei en aragonés cheneral esmortezer, por castellanizar-se foneticament esmortexer) si no ye un caso de posible occitanismo u catalanismo.

[editar] Berbos incoatibos en catalán

En catalán bi ha como en aragonés pocos berbos incoatibos de la conchugazión que remata en -er (néixer, créixer, meréixer), pero bi n'ha muitos de la conchugazión que remata en -ir, estando la mayoría de los berbos d'esta conchugazión.

Berbos de la conchugazión en -ir que no se conchugan como incoatibos bi n'ha pocos: bullir, collir, cosir, eixir, fugir, morir, obrir, omplir, sentir, tossir, beluns como tossir e cosir son irregulars con cambeyo d'O ta U, e belatros pueden conchugar-se como incoatibos en a parla bulgar como sentir.

Bi ha berbos de la conchugazión en -ir como llegir u mentir on coesiste la traza incoatiba con la traza orichinal (ell llegeix/ell llig).

Lo incremento berbal -ix- prene diferents formas seguntes os dialeutos, e ye diferent en la luenga balenziana (més pareixito n'esto a lo catalán meyebal escrito) respeuto a lo estandard de Catalunya.

[editar] Berbos incoatibos en catalán occidental

Lo estandard balenzián mos sirbe como referencia pa entender como son los berbos incoatibos tamién en catalán noroccidental, cambeyando bels morfemas presonals de primera e terzera presona que diferenzian estos dos grans grupos de parlas occidentals.

Present d'endicatibo	Present de subchuntibo
Servisc	Servisca
Servixes	Servisques
Servix	Servisca
Servim	Servim
Serviu	Serviu
Servixen	Servisquen

En catalán nordoccidental ye, con barians menors por lo que fa a pronunziar-lo, con X u S debant de lo fonema k:

Present d'endicatibo	Present de subchuntibo
Servixco	Servixca
Servixes	Servixques
Servix	Servixque
Servim	Servim
Serviu	Serviu
Servixen	Servixquen

En bellas zonas de lo catalán ribargozán, lo sufixo incoatibo s'ha perdito en lo mesmo prozeso castellanizador que ha feito que se pierda en aragonés ribagorzán jo sirvo en cuenta de jo servixco.

[editar] Berbos incoatibos en catalán oriental

Lo estandard que s'emplega en Catalunya reflexa una traza muito estendillata en catalán oriental. La E se pronunzia ubierta.

Present d'endicatibo	Present de subchuntibo
Serveixo	Serveixi
Serveixes	Serveixis
Serveix	Serveixi
Servim	Servim
Serviu	Serviu
Serveixen	Serveixin

En las Islas Balears lo estandard local ye diferent, e como en lo estandard balenzián, reflexa una traza més pareixita a lo luengache meyebal.

[editar] Berbos incoatibos en rumán

La mayor parte de los berbos incoatibos de la conchugazión rematata en -i (cuarta conchugazión rumana), se conchugan como incoatibos . Entre los pocos berbos rematatos en -i que no se conchugan como incoatibos tenemos a fugi, a auzi, a iesi, a dormi, a muri, a sări, a acoperi, a contribui, a despărti, a pipăi, a simti, a sti, a veni, a oferi; muitos d'ellos con la mesma zercustanzia en catalán (a fugi, a dormi, a muri, a simti), atros se conchugan como incoatibos en castellán e catalán pero no en rumán (a oferi), atros son irregulars en cuasi totas las luengas niolatinas e no se conchugan como incoatibos (a veni).

Present d'endicatibo	Present de subchuntibo
Vorbesc	Vorbesc
VorbeÅŸti	VorbeÅŸti
vorbeşte	Vorbească
Vorbim	Vorbim
Vorbiţi	Vorbiţi
Vorbesc	Vorbească